Enn á lífi

Ég er enn á lífi. Er aðeins skárri í dag. Er allavega uppistandandi þótt það sé ekki meira en það. Sleppti tíma í morgun en skal í þennan ritlistartíma á eftir. Sá að ég hafði keypt vitlausa bók fyrir spænskuna svo ég þarf í Bóksöluna fyrir tíma. Vex mér í augum að keyra hvað þá labba. Hafði mig samt í sturtu áðan og í einhver föt. Setti á mig augnblýant og allt í mótmælaskyni við veikindin. Þetta var allt saman aðeins of mikil hreyfing og fötin mín eru blaut af svita. Svo sem ekki mikið sem ég þarf að gera í dag. Fara í bóksöluna, í tíma, heim að hlusta á tímann á netinu sem ég missti af í morgun (tæknin gott fólk) og glósa. Kannski ná í Hrund í skólann, fara að sækja Rakel til ömmu sinnar, gefa henni að borða og baða, skipta um föt og fara svo á forsýningu á Veðramótum eftir Dunu. Þar er örugglega bannað að hósta, hnerra og snýta sér.

Kannski ég láti Hrund taka strætó heim, sækja Rakel og hugsa um hana, hlusti á eins mikið af tímanum (sem ég missti af í morgun) og ég hef orku til, fari í sömu fötum og ég er í á forsýninguna og hósti þar eins og ég vil.

Og fari snemma að sofa. Sumir myndu segja að það ofantalda væri það eina skynsamlega í stöðunni. Það má allavega reyna.

Með hor í nös og skólakvíða í hjarta, Díana Rós 

Athugasemdir

[Tinna Rós 9.9.2007 kl. 18:13]

Skrítið.. Um daginn kvittaði ég fyrir viðveru en það hefur ekki skilað sér. Ég hef líka alltaf verið frekar slæm í hugarreikningi. Hálf skammast mín fyrir að vera í verkfræði en telja samt ennþá með puttunum!

Ég er forvitin að vita hvaða kennari er svona tæknilegur! Það hefur greinilega margt breyst í spænskunni á einu ári. Síðast þegar ég vissi voru þar  allnokkrir kennarar sem notuðu ennþá glærur..

Ég vonast til að fá ykkur í heimsókn á næstunni. Ég er búin að krakka-prufa kisurnar og reyndust þær vel. Rambó var reyndar fljótur að forða sér út um gluggan, en Ninja leyfði þeim að hnoðaða sér til og frá.

 Vó, langt komment!

Besos!