Breytingar

Eftir tæpar 12 vikur, miklar rökræður við brjóstaráðgjafa (í þriðja skipti síðan í desember) og för með barnið til Gests Pálssonar, meltingarsérfræðings, leigði ég mjaltavél í fyrradag, keypti pumpusett og svaka flottan pela, mjólkaði mig og gaf Röskvunni herlegheitin.

Og í fyrsta skipti í hundrað, billjón ár drakk barnið án áreynslu og ég gat slakað á. Ekkert loft að trufla hana og svo ropaði hún á eftir og var svo sæl.

Ég gæti grenjað ...

... af gleði

Þetta gekk bara ekki lengur með brjóstið, ég var orðin þunglynd og leið hrikalega illa og ekki leið Röskvunni vel þar sem hún rembdist við að drekka og var fyrir sjálfri sér og illt af öllu loftinu sem hún gleypti. Það fylgir því mikill tregi og söknuður að taka þetta skref en ef ég vil að barnið mitt nærist almennilega er ekkert annað í stöðunni. Ég stefni á það að mjólka mig og gefa henni mömmumjólk í hverri gjöf og það SKAL ganga (ég ætla samt að reyna að vera ekki of svekkt ef ég neyðist einhvern tímann til að gefa henni þurrmjólk líka, það er allavega ekki hægt að segja að ég hafi ekki reynt).

Síðan á þriðjudag hef ég því gefið Röskvunni pela en hún fær áfram brjóst ef hún vaknar á nóttunni og fyrst á morgnana því einu skiptin sem henni tekst vel að drekka er þegar hún er hálfsofandi.  Ég mjólka mig 5-6 sinnum á dag og er á fullu að örva framleiðsluna svo ég fái með tímanum meira í hvert skipti og þurfi ekki að vera neitt stressuð yfir því að mjólka örugglega nóg fyrir hana (og get þá jafnvel safnað í frystinn líka).

Það fylgir þessu svoooo mikill léttir og frelsi. Núna hlakka ég til að gefa henni og nýt dagsins og mér finnast mér allir vegir færir þar sem ég þarf ekki að kvíða því að gefa henni á almannafæri lengur. Ég gat loks sætt mig við að skipta yfir í pela eftir að brjóstaráðgjafinn stakk upp á því þar sem ég var hreinlega búin að reyna allt bara. Gestur Páls sagði svo að Röskva væri greinilega með mjög þröngt magaop og ætti erfitt með að losa loft og því væri peli góð lausn og eina lausnin í rauninni nema ég vildi fara að dæla í hana lyfjum. Ég fór til hans í gær og svo hringdi hann í dag til að tékka hvernig gengi (ÉG ELSKA ÞENNA DÚLLUMANN) og hrósaði mér í bak og fyrir. Eins og hann sagði skiptir mestu að Röskva fái brjóstamjólkina, ekki hvernig hún fær hana.

Ég er helaum í túttunum eftir allt pumpið og enn þá pínu óörugg en ég er samt hamingjusöm. Núna get ég loksins notið þess almennilega að vera með krílinu mínu og þarf ekki að horfa á hana pirrast.

Þótt mér finnist mjög sárt að geta ekki verið með hana á brjósti þá verð ég bara að gera það besta úr stöðunni. Mér finnst yndislegt ef ég get gefið henni brjóstamjólkina áfram.

Er þetta ekki æðislegt?

Athugasemdir

[inam 21.1.2010 kl. 13:19]

Glæsilegt díana! mestu máli skiptir að hlutirnir gangi og allir séu sáttir!

Sé að þú hefur masterað the art of smileys!

[dr 21.1.2010 kl. 18:56]

[Arna 22.1.2010 kl. 20:17]

Frábært að þetta gengur betur :)

Svo smá fréttir af minni ...það er bara eitt stikki kríli á leiðinni á þessu heimili :)

Vona að allt gangi vel hjá ykkur mæðgum (öllum)

kv.

[Maríanna (úr Réttó) 23.1.2010 kl. 15:32]

Sæl Díana

Ég les bloggið þitt annað slagið en hef aldrei kvittað fyrir. Ég átti stelpu 31.okt 2009, litla Rebekku. Þú ert hetja að hafa barist í þessu brjóstaveseni í 12 vikur, og enn meira hetja að hafa valið þá leið sem þér finnst henta þínu barni best. Svona vesen tekur svo á sálina, ég kannast við það!

Svo er Óli bróðir minn og Einar bróðir þinn bestu vinir. Voru saman í Réttó, eru báðir í MH núna og í leiklistinni í Borgarleikhúsinu. Lítill heimur!

Baráttukveðjur Maríanna

[dr 24.1.2010 kl. 22:22]

Arna: Til lukku! Voðalega erum við samferða:)

Maríanna: Lítill heimur ... Hafði ekki hugmynd um að Óli væri bróðir þinn! Til hamingju með skottuna:)