Bumbumyndir

Jæja, þá er ég loksins búin að gera bumbumyndaalbúm. Farið í myndaalbúm hér til hliðar og skoðið herlegheitin. Klikkið svo á myndirnar til þess að sjá þær í fullri stærð með texta (ég fattaði ekki að gera það strax aulinn sem ég er).

Er maður ekki fínn?

Ljúft

Það er ótrúlega ljúft að vinna alla daga með vinkonum sínum. Ég hlakka til að koma í vinnuna á hverjum degi sem er alveg einstök tilfinning.

Sit stundum við tölvuna, horfi út um gluggann og út á Suðurgötu og undrast lán mitt. Strýk kúluna og hugsa um stelpurnar mínar og sólina sem skín á okkur. Finnst gott að vera á Íslandi þrátt fyrir allt drullumallið.

Er alltaf jafn hissa þegar ég vakna á morgnana og lít niður á kúluna. Á erfitt með að tengja hana við barnið mitt inni í henni. Bæði hlakka til og kvíði 20 vikna sónarnum. Vona svo heitt og innilega að það sé í lagi með litla kúlusúkk.

Við kyrnur stefnum á að setja niður kartöflur um helgina. Maður þarf nú líka að gera eitthvað í þessum garði einhvern tíma. Hvar fær maður fínan hestaskít í kartöflubeðið? Er málið að fara upp í hesthús með fötu eða?

Er að fara í meðgöngunudd hjá 9 mánuðum á morgun og get ekki beðið. Líður betur í bakinu bara af því að hugsa um það. Ef þú ert enn að spá í einhverju að gefa mér í útskriftargjöf tengdó þá er ég alveg til í meira meðgöngunudd hjá 9 mánuðum, sérstaklega ef ég verð ánægð með tímann á morgun. Hef heyrt góðar sögur af konunni sem mun nudda mig. Svo langar mig líka í tarotspil og bók með sem útskýrir herlegheitin. Væri líka ánægð með inneign í bókabúð. Það er svo erfitt að láta mig hafa peninga af því að ég enda yfirleitt á því að eyða þeim í Bónus ...

Annars fékk ég fullt af peningum í útskriftargjöf og veit varla hvað ég á að gera við þá. Ætla nú allavega að kaupa mér útskriftarkjól og kannski sundbol sem hrynur ekki niður um mig og berar brjóstin í miðri sundlaug.

Er að fara til ljósu á eftir í mælingu á þessum blessaða háþrýstingi. Vona að hann hagi sér vel. Er að reyna að vera slök á vigtnni en sé að ég er að þyngjast hægt og rólega sem ég er alveg sátt við. Hef ekki náð 3 kílóum í þyngdaraukningu enn þá (hef sankað að mér ýmsum ráðum við bjúg sem virka vel og vigtin fór niður um nær eitt og hálft kíló bara eftir eina sundferð um daginn, svo mikill var bjúgurinn, er samt betri núna) sem er mjög gott. Var svo hrædd um að brennslan mín, sem er nánast engin, myndi bara ekki ráða við þessa óléttu og ég myndi þyngjast um kíló á viku en kroppurinn minn stendur sig þrátt fyrir hversu illa ég fór með hann.

Nú er mig farið að lengja eftir stelpunum. Er verkefnalaus og takamarkað hvað ég get röflað hér. Mér heyrist einhver vera að koma ...

Gleði

Útskriftarveislan var æði. Hélt að það yrði mjög erfitt að toppa 25 ára veisluna en þessi var ekkert síðri. Allir mættir sem mér þykir vænst um (nema Tístli frændi sem er á Grænlandinu), grillið var gott og sólin braust fram úr skýjunum. Þeir sem sátu lengst voru til að verða 10 sem er bara einmitt eins og þetta á að vera. Ég fékk dýrindis gjafir og gull, ilmandi blóm og hlý knús. Takk fyrir mig!!!

Vöknuðum snemma á sunnudagsmorgun og kláruðum svo að taka okkur til. Brunuðum á Selfoss til tengdapabba og vorum þar þangað til seinnipartinn í gær. Settum fína tjaldið okkar upp í garðinum og vorum í nokkurs konar útilegu. Sleiktum sólina, fórum í sund og grilluðum og sváfum svo þétt saman í nýju svefnpokunum okkar. Fengum fínasta veður, fylltum vatnsblöðrur og ærsluðumst, Sprundin tálgaði, ég las og Rakel lék sér í fótbolta. Vel heppnað í alla staði.

Sumarið er byrjað þrátt fyrir ský á himni akkúrat núna.

Jibbí

Mér tókst það. Kláraði námskeiðið og ritgerðina og fékk fínar einkunnir. 8 fyrir ritgerðina og 9 fyrir námskeiðið. Er ekkert smá sátt. 8 er fínt fyrir ritgerð sem var skrifuð á síðustu stundu og 9 flott fyrir námskeiðið, mætti bara helminginn af önninni og gleymdi svo orðabókunum í prófinu.

Útskrifast með bumbu og 8,5 í meðaleinkunn.

Helvíti stolt af mér bara.

Mæður

Nú er búið að senda eyðublöð til Þjóðskrár þar sem beðið er um breytingu á kenninöfnum okkar Hrundar og Rakelar. Þegar þetta verður komið í gegn verðum við allar kenndar við mæður okkar og föður (ég með eftirnafn):

Díana Rós Aðalbjargardóttir Rivera

Hrund Sigurlaugar- og Þórisdóttir

Rakel Silja Hrundar- og Róbertsdóttir.

 

Þar sem þetta eru of margir stafir verða nöfn mæðra okkar skammstöfuð í Þjóðskrá og í öllum opinberum skjölum:

Díana Rós A. Rivera

Hrund S. Þórisdóttir

Rakel Silja H. Róbertsdóttir.

 

Ekki amalegt að kenna sig við þessi kjarnakvendi.

JÁÁÁÁÁÁ

Var að skila BA-ritgerðinni fullkláraðri!!!!!!!

Sjitturinn titturinn hvað þetta var mikil vinna og dísús hvað lokatörnin í dag tók á.

Takk elsku besta mamma í heimi fyrir að trúa alltaf á mig og fara yfir herlegheitin þar til þú varst að missa vitið.

Takk stelpurnar mínar fyrir að eiga alltaf til knús handa mér.

Takk tengdó fyrir að vera klettur í mínu lífi.

Takk Jói fyrir þolimæðina.

Takk öll hin rassgötin mín.

 

Þetta er merkisdagur. Í dag fann í ég fyrsta skipti fyrir krílinu mínu. Eins og lítill fjörfiskur neðst í leginu. Er nokkuð viss um að þetta var krílus.

Hræddur

Það hræðir mig að svínaflensan sé komin til landsins og sérstaklega að helmingur þeirra sem hefur þurft að leggjast inn á spítala vegna flensunnar í Bandaríkjunum hafi verið ófrískar konur og aðrir sem eru veikir fyrir. Auk þess er tæpur helmingur látinna í Mexíkó ófrískar konur eða fólk sem er veikt fyrir.

Búhú.

Ég er ófrísk kona.

Treyttur

Úff. Þetta var svaka törn með leiðbeinandanum. Var alveg að gefast upp á tímabili, finnst þetta eitthvað svo óyfirstíganlegt. Kláraði að skrifa ritgerðina á síðustu dropunum og á eiginlega ekkert eftir í lagfæringar. Er svo pínu alveg að fara að grenja núna, er svo þreytt.

Ég fæ allavega ekki lægra en 7,5 en ekki víst að ég nái 8. Verð bara að reyna að hugsa að 7,5 sé gott miðað við allt sem á undan er gengið og miðað við þá takmörkuðu orku sem ég hef. Var að telja saman áðan og ætli ég hafi ekki skrifað ritgerðina á svona 3-4 vikum. Með heimildaöflun. Náði mér í einhverjar heimildir í febrúar og skrifaði innganinn í tveimur hollum, gerði ekkert í mars og apríl nema líða illa og hafa áhyggjur af unganum mínum og náði að gera eitthvað smá áður en ég þurfti að fara að læra fyrir próf. Svo bara massaði ég þetta á tveimur dögum.

Ég veit að þetta er eins og löng afsökun en ég þarf að muna þessar staðreyndir svo ég geti sætt mig við 7,5. Ég myndi alveg skilja það ef ég fengi þá einkunn þótt ég yrði ekkert voða glöð. Ég sagði leibeinandanum hins vegar að ég myndi taka gleðidans fengi ég 8 og hann er eitthvað spenntur fyrir þessum dansi.

Nei, nei, eigum við ekki að segja að líklegasta einkunnin sé 7,5 og allt fyrir ofan það væri gífurlegur bónus og ég myndi pottþétt fara að grenja mikið af gleði.

ps. Annars hitti ég spænskukennarinn minn áðan sem vildi endilega hrósa mér fyrir prófið sem ég fór í hjá henni orðabókarlaus um daginn. Hún sagði að það hefði verið mjög flott og mér hefði farið svo mikið fram. VÚHÚ.

Segiði mér nú að ég sé dugleg. En samt ekki nema ykkur finnist það.

Töffaramótorhjólastelpa

Duglegasta stelpan í heiminum æfði sig í að hjóla án hjálpardekkja í gær. Svolítið langt síðan við gerðum það síðast en hún hafði engu gleymt og rúllaði þessu upp. Undir lokin var hún alveg farin að hjóla sjálf og mundi eftir að bremsa í stað þess að sleppa bara fótunum af pedulunum með þeim afleiðingum að enda sífellt út í runna. Hún fékk puslu og ís á miðri leið, hugsað sem bæði verðlaun og orka, og brilleraði á leiðinni heim.

Henni fannst hún vera flottasta töffaramótorhjólastelpan og okkur fannst það líka. Ekkert smá kúl með hné- og olnbogahlífar og grifflur (eða er þetta með einu f-i?).

Hún var örþreytt þegar við komum heim eftir næstum þriggja tíma túr og var fljót að sofna með nýja marbletti út um allt.

Litla hetjan mín.

Erum að hugsa um að skreppa í sund á eftir og erum búnar að mæla okkur mót við Robba niðri í Laugardal svo hún geti sýnt pabbanum hvað hún er dugleg. Þau fara svo heim saman yfir helgina.

Ég er að fara að hitta leiðbeinandann minn á eftir og vona að hann hafi einhverja góða hluti að segja um ritgerðina. Nýti svo næstu daga í að leggja lokahönd á ritgerðina, fara í útskriftarveislu hjá Unni duglegustu frænku og á tónleika með Lhasa sem er algjör snillingur. Á von á því að þetta verði frekar viðburðarrík helgi.

Íha.

Sumar

Það sem fyrir mér er sumar breytist alltaf eitthvað með árunum. Einu sinni var ekkert meira sumar en pabbi og Svíþjóð með tilheyrandi hjólaferðum, grilli, ís, böðun og spænskuslettum. Seinna voru það við hinar fjórar fræknu sem ekki máttum af hvor annarri sjá allt sumarið og eyddum því helst öllu í fliss og unglingaveiki. Þegar ég varð enn eldri var sumar útlönd, Hróarskelda, Spánn, interrail og auðvitað sumarvinna inn á milli.

Það sem hefur alltaf verið sumar frá upphafi er mamma brún í framan í ermalausum bol og sumarið speglast í háa enninu. Þegar mamma er komin í stuttermabol út er komið sumar. Hún er hins vegar berleggjuð og helst í opnum skóm frá því að snjórinn fer svo það er ekki að marka það.

Sumar núna er Hrund í berfætt í sandölum, manneskja sem er í ofurhlýjum gönguskóm fram í maí. Rakel með sólarvörn í hárinu, mamma að lesa úti á palli, garðurinn hennar tengdó, heitur pottur, berir leggir mínir undir pilsinu og stækkandi bumba.

Ætlum í sund í fríinu á morgun þótt það verði farið að rigna. Samt sumar.

Annars er ég að hugsa um að fagna lokum BA-námsins með smá grillveislu fyrir fjölskylduna næstu helgi. Við Hrund ætlum að bjóða heim í fallegasta kotið okkar og fá alla sem okkur þykir vænst um til að gleðjast með okkur.